ނަމާދުގައި އަންހެނުންގެ ޢައުރައަކީ މޫނާއި ދެއަތްތިލަ ނޫން ހަށިގަނޑުގެ ހުރިހާ ތަނެކެވެ. ވީމާ އަޞްލަކީ އަންހެނާ ނަމާދުކުރާއިރު، މޫނާއި ދެއަތްތިލަ ކަޝްފުކުރުމެވެ. މޫނުބުރުގާ އަޅާ މީހަކު ކަމުގައިވިޔަސް މެއެވެ. ދެން އޮތީ، މޫނު ބުރުގާ އަޅާ މީހަކު ހިލޭ ފިރިހެނުންނަށް ފެންނަ ތަނެއްގައި ނަމާދުކުރަން ޖެހިއްޖެނަމަ، އޭނާ މޫނުބުރުގާ ނަގަންޖެހޭނެތޯ ނުވަތަ ނޫންތޯ އުފެދޭ ސުވާލެވެ.
އަންހެނާގެ ޢައުރަ އެކި ޙާލަތްތަކުގައި ތަފާތު ވާނެއެވެ. އެގޮތުން ފިރިމީހާގެ ކުރިމަތީގައި އަންހެނާގެ ޢައުރަ ނީންނައިރު، މަޙްރަމުންގެ ކުރިމަތީގައި އޭނާއަށް އޭނާގެ ހަށިގަނޑުން ޢާއްމުކޮށް ފާޅުވާ މިންވަރު ކަމުގައިވާ އިސްތަށިގަނޑާއި ކަރާއި، އަތްދަނޑި އަދި ފައިތިލަވެސް ކަޝްފުކުރެވޭއިރު، ހިލޭ ފިރިހެނަކު ހުރެއްޖެނަމަ، ފިރިމީހާ ކުރިމަތީގައިވެސް އަދި މަޙްރަމުންގެ ކުރިމަތީގައިވެސް އަބަދުވެސް ގަދަވެގަންނާނީ ހިލޭ ފިރިހެނާގެ ކުރިމަތީގައި ނިވާކުރަންޖެހޭ އޭނާގެ ޢައުރައެވެ. އެހެންކަމުން ޙައްޖާއި ޢުމުރާގެ ޙާލަތުގައި އަންހެނާގެ ޢައުރައަކީ މޫނާއި ދެއަތްތިލަ ފިޔަވައި ހުރިހާ ތަނެއް ކަމުގައިވިޔަސް، ހިލޭ ފިރިހެނަކު ހުރެއްޖެ ޙާލަތުގައި ހިލޭ ފިރިހެނާގެ ކުރިމަތީގައި ނިވާކުރަންޖެހޭ މިންވަރަށް ނިވާކުރަންޖެހޭނެއެވެ. އިޙްރާމުގައި ހުންނައިރު ނިޤާބު މަނާނަމަ، އެހެން ގޮތަކުން މޫނު ނިވާކޮށްގެންނެވެ. ޢާއިޝާ ރަޟިޔަﷲ ޢަންހާގެ ރިވާޔަތުގައިވާ ފަދައިންނެވެ.
ޢާއިޝާ ރަޟިޔަﷲ ޢަންހާ ވިދާޅުވިއެވެ.
«كَانَ الرُّكْبَانُ يَمُرُّونَ بِنَا وَنَحْنُ مَعَ رَسُولِ اللَّهِ صَلَّى اللهُ عَلَيْهِ وَسَلَّمَ مُحْرِمَاتٌ، فَإِذَا حَاذَوْا بِنَا سَدَلَتْ إِحْدَانَا جِلْبَابَهَا مِنْ رَأْسِهَا عَلَى وَجْهِهَا فَإِذَا جَاوَزُونَا كَشَفْنَاهُ» [رواه أبو داود (1833) وحسن الألباني في جلباب المرأة (ص: 107)]
މާނައީ: “ރަސޫލުﷲ ޞައްލަﷲ ޢަލައިހި ވަސައްލަމަގެ އަރިހުގައި ތިމަން ކަނބަލުން އިޙްރާމުގައި ވަނިކޮށް، ސަވާރީތަކުގައި ހުރަސްކޮށްފައި މީސްތަކުން ދެއެވެ. އެބައިމީހުން އަރާ ހަމަވުމުން ތިމަން ކަނބަލުންގެ ތެރެއިން ކަނބަލަކު ޖިލްބާބުން މޫނު ފޮރުވައެވެ. ފަހެ އެބައިމީހުން ހުރަސްކޮށްފައި ދިޔުމުން ކަޝްފުކުރަމެވެ.”
ޢީދު ނަމާދުކުރާ މައިދާނުގައިވެސް ހިލޭ ފިރިހެނުންނަށް ފެންނަގޮތަށް ހުންނަނަމަ، އެ ޙާލަތުގައި މޫނު ނިވާކޮށްގެން ނަމާދުވެސް ކުރެވޭނެއެވެ. އެއީ ނަމާދުގައި އަންހެނާގެ ޢައުރައިގެ މައްޗަށް އެ ޙާލަތުގައި ހިލޭ ފިރިހެނުން ކުރިމަތީގައި އަންހެނާގެ ޢައުރަ ފޮރުވަންޖެހޭ ޖެހުން ގަދަވެގަންނާތީއެވެ.
މޫނު ބުރުގާ އަޅައިގެން އުޅޭ އަންހެނަކު، މަރުވެއްޖެނަމަ އޭނާގެ މޫނު ބެލުމާމެދުވެސް އޮތީ ހަމަ މި ޙުކުމެވެ. އޭނާގެ މަޙްރަމުން ނޫން މީހަކަށް އޭނާގެ މޫނު ދައްކައިގެން ނުވާނެއެވެ. އެހެނީ، މައްޔިތާގެ ޙުރުމަތް ދިރި ހުރި މީހާގެ ޙުރުމަތް ފަދައެވެ.
ބުއްދީގެ ގޮތުން ބަލާއިރު، ތިމާގެ މުޅި ހަށިގަނޑަކީ ޢައުރަ ކަމުގައި ޤަބޫލުކޮށްގެން، މުޅި ހަށިގަނޑުގެ ހިލޭ ފިރިހެނުންގެ ލޯތަކަށް ފޮރުވާ ޢިއްފަތްތެރި އަންހެން ކުއްޖަކު، އޭނާގެ މޫނު ހިލޭ ފިރިހެނުންނަށް ކަޝްފުކުރުމަކީ ހަމަޖެހޭ ކަމެއް ނޫނެވެ.
އަންހެނަކު މޫނުބުރުގާ އަޅައިގެން އަދި އަންގި ލައްވައިގެން ނަމާދުކުރުން ހުއްދަވާނެތޯ ޝައިޚު އުޘައިމީން ރަޙިމަހުﷲ އާ ސުވާލުކުރެވުނު ހިނދު ޖަވާބުގައި ވިދާޅުވިއެވެ.
“އަންހެނަކު ނަމާދުކުރަނީ އޭނާގެ ގޭގައި ނުވަތަ ހަމައެކަނި މަޙުރަމުންނަށް ފެންނަފަދަ ތަނެއްގައި ކަމަށްވާނަމަ، އެންމެ އައުލާވެގެންވަނީ ނަމާދުގައި މޫނާއި ދެއަތްތިލަ ހާމަކުރުމެވެ. އެއީ ސަޖިދަޖަހާއިރު ނިތްކުރިއާއި ނޭފަތް އަދި ދެއަތްތިލަ ސަޖިދަޖަހާ ތަނުގައި ސީދާ ޖެހުމަށްޓަކައެވެ. ނަމަވެސް، ހިލޭ ފިރިހެނުންނަށް ފެންނަ ހިސާބެއްގައި ނަމާދުކުރާނަމަ، މޫނު ނިވާކުރުން ލާޒިމްވާނެއެވެ. ސަބަބަކީ ހިލޭ ފިރިހެނުންގެ ކުރިމަތީގައި މޫނު ނިވާކުރުމަކީ ވާޖިބު ކަމަކަށްވެފައި، އެމީހުންގެ ކުރިމަތީގައި މޫނު ހާމަކުރުން ހުއްދަވެގެން ނުވާތީއެވެ. މިކަމަށް ކީރިތި ޤުރުއާނާއި، ރަސޫލާ ﷺ ގެ ސުންނަތުންނާއި، ބުއްދިވެރިއަކު އަދި ޚާއްޞަކޮށް މުއުމިނަކު ދެކޮޅު ނުހެދޭފަދަ ސާފު ދަލީލުތައް މިކަމުގައި އައިސްފައިވެއެވެ.
އަދި އަންގި ލެއްވުމަކީ ޝަރުޢީގޮތުން އޮންނަ ކަމެކެވެ. މިއީ ޞަޙާބީ ބޭކަނބަލުންގެ ޢަމަލުފުޅުތަކުންވެސް ފެންނަން އޮތް ކަމެކެވެ. އެކަލޭގެފާނު ﷺ ޙަދީޘްކުރައްވާފައިވެއެވެ: “އިޙްރާމް ބަނދެގެން ހުންނަ އަންހެނާ މޫނުބުރުގާ ނާޅާށެވެ. އަދި އަންގިވެސް ނުލާށެވެ.” މި ޙަދީޘުން ދޭހަވަނީ އާންމު ޙާލަތްތަކުގައި އެކަނބަލުން އަންގި ލައްވައިގެން އުޅުއްވުމަކީ އާދައެއް ކަމެވެ.
ވީމާ، ހިލޭ ފިރިހެނުން ތިބޭ ތަނެއްގައި ނަމާދުކުރާއިރު އަންގިލުމަކީ މައްސަލައެއް ނޫނެވެ. މޫނު ނިވާކުރުމާ ގުޅޭގޮތުން ދަންނަވާއިރު، ނަމާދުގައި ކޮޅަށް ހުންނައިރު ނުވަތަ އިށީނދެގެން އިންނައިރު މޫނު ނިވާކޮށްގެން ހުރެވިދާނެއެވެ. ނަމަވެސް ސަޖިދައަށް ދާއިރު، ނިތްކުރި ސަޖިދަޖަހާ ތަނުގައި ޖެއްސުމަށްޓަކައި މޫނު ހާމަކުރަންވާނެއެވެ.”
مجموع فتاوى ورسائل الشيخ محمد بن صالح العثيمين رحمه الله – المجلد الثاني عشر – باب ستر العورة.
