اللَّهُمَّ إِنَّا نَسْتَعِيْنُكَ وَنَسْتَغْفِرُكَ وَنُؤْمِنُ بِكَ وَنَتَوَكَّلُ عَلَيْكَ وَنُثْنِيْ عَلَيْكَ الْخَيْرَ كُلَّهُ نَشْكُرُكَ وَلَا نَكْفُرُكَ وَنَخْلَعُ وَنَتْرُكُ مَنْ يَفْجُرُكَ.
ޔާ ﷲ! ހަމަކަށަވަރުން އަޅަމެން އިބަ އިލާހުގެ ޙަޟްރަތުން މަދަދަށް އެދެމުއެވެ. އަދި އަޅަމެން ފާފަފުއްސެވުން އެދި ދަންނަވަނީ އިބަ އިލާހުގެ ޙަޟްރަތުންނެވެ. އަދި އަޅަމެން އިމާންވަނީ އިބައިލާހަށެވެ. އަދި އަޅަމެން ވަކީލުކުރަނީ އިބައިލާހަށެވެ. އަދި އަޅަމެން އެންމެހާ ރިވެތި ސަނާ ކިޔަނީ އިބަ އިލާހަށެވެ. އަޅަމެން އިބައިލާހަށް ޝުކުރުވެރިވަމެވެ. އަދި އަޅަމެން އިބައިލާހަށް ކުފުރުވެރިނުވަމެވެ. އަދި އިބަ އިލާހަށް އުރެދޭ ފާފަވެރިންނާ އަޅަމެން ދުރުހެލިވެ ގުޅުން ކަނޑައިލަމުއެވެ.
اللَّهُمَّ إِنَّا نَعُوذُ بِكَ مِنْ زَوَالِ نِعْمَتِكَ ، وَتَحَوُّلِ عَافِيَتِكَ ، وَفُجَاءَةِ نِقْمَتِكَ ، وَجَمِيعِ سَخَطِكَ.
ޔާ ﷲ! އިބަ އިލާހުގެ ނިޢުމަތްތައް ފިލައިގެން ދިޔުމުންނާއި، އިބަ އިލާހު ދެއްވާފައިވާ ދުޅަހެޔޮކަން ބަދަލުވުމުންނާއި، އިބަ އިލާހުގެ ޢަޛާބު ކުއްލިއަކަށް އައުމުންނާއި އިބަ އިލާހުގެ އެންމެހާ ކޯފާއިން، އަޅަމެން ރައްކާތެރިކޮށްދެއްވުން އެދި އިބައިލާހުގެ ޙަޟްރަތަށް ދަންނަވަމެވެ.
اللَّهُمَّ إِنَّا نَعُوذُ بِكَ مِنَ الْبَرَصِ وَالْـجُنُونِ وَالْجُذَامِ وَمِنْ سَيِّئِ الْأَسْقَامِ.
ޔާ ﷲ! ހަމަކަށަވަރުން އަޅަމެން، ބަރަޞް ބައްޔާއި، މޮޔަވުމާއި، ޖުޒާމު ބައްޔާއި، އެންމެހާ ނުރައްކާތެރި ބަލިތަކުން، ރައްކާތެރިކޮށްދެއްވުން އެދި އިބައިލާހުގެ ޙަޟްރަތަށް ދަންނަވަމެވެ.
اللَّهُمَّ إِنَّا نَعُوذُ بِكَ مِنْ جَهْدِ الْبَلَاءِ وَدَرَكِ الشَّقَاءِ، وَسُوءِ القَضَاءِ، وَشَمَـاتَةِ الأَعْدَاءِ.
ޔާ ﷲ! ބަލާވެރިކަމުގެ ދަތިކަމުންނާއި، އަބާއްޖަވެރިކަމުގެ ދަށްކަމުންނާއި، މިންވަރުގެ ނުބައިކަމުންނާ އަދި މިއަޅާގެ ޢަދާވާތްތެރިން މިއަޅާއަށް ދިމާވާ ދެރަކަންތައްތަކާއި އުފާކޮށްހެދުމުން، މިއަޅާ ރައްކާތެރިކޮށްދެއްވުން އެދި އިބަ އިލާހުގެ ޙަޟްރަތަށް ދަންނަވަމެވެ.
اللَّهُمَّ احْفَظْنَا وَبِلَادَنَا مِنْ خَطَرِ الْـفَيْرُوسَاتِ الْـقَاتِلَةِ وَالْأَمْرَاضِ الْـفَتَّاكَةِ يَا رَبَّ الْـعَالَـمِيْنَ. اللَّهُمَّ اصْرِفْ عَنَّا الْـفَيْرُوسَ كُورُونَا بِلُطُفِكَ يَا لَطِيْفُ. إِنَّكَ عَلَى كُلِّ شَيْئٍ قَدِيرٌ.
ޔާ ﷲ! އަޅަމެންނާއި އަޅަމެންގެ ޤައުމު ނުރައްކާތެރި ވައިރަސްތަކުންނާއި، ފަނާކުރަނިވި ބަލިތަކުން ރައްކާތެރިކޮށްދެއްވާނދޭވެ! އޭ ޢާލަމްތަކުގެ ރައްބު! އޭ އޯގާވަންތަ އިލާހު! ޔާ ﷲ! އިބައިލާހުގެ އޯގާވަންތަކަމުން، ކޮރޯނާ ވައިރަސް އަޅަމެންގެ ތެރެއިން ފިއްލަވާނދޭވެ! ހަމަކަށަވަރުން އިބައިލާހީ ހުރިހާ ކަމެއްގެ މައްޗަށް ކުޅަދުންވަންތަ އިލާހެވެ.
وَصَلِّى لله عَلَى نَبِيِّنَا مُحَمَّدٍ وَعَلَى آلِهِ وَصَحْبِهِ وَسَلِّمْ تَسْلِيْمًا كَثِيْرًا إِلَى يَومِ الدِّيْنِ.
އަޅަމެންގެ ނަބިއްޔާ މުޙައްމަދު ޞައްލަﷲ ޢަލައިހި ވަސައްލަމައަށާއި އެކަލޭގެފާނުގެ އާލުންނާއި އަޞްޙާބުންނަށް ޞަލަވާތް ލައްވާނދޭވެ. އަދި ގިނަގުނަވެގެންވާ ސަލާމަކުން ޤިޔާމަތާ ޖެހެންދެން އެބޭކަލުންނަށް ސަލާމް ލައްވާނދޭވެ.
